उपमहानगरपालिकाको कार्यालयले सामुदायिक बिद्यालयको शिक्षक तथा कर्मचारीहरुको तलब मासिक रुपमा सिधैँ खातामा पठाउन थालेपछि बारा जीतपुरसिमरा उपमहानगरपालिकाका शिक्षकहरु खुसीले गद्गद् भएका छन् ।
जीतपुरसिमरा उपमहानगरपालिकाले सोमबार नगरभरिका बिद्यालयका ४ सय ६२ जना शिक्षक तथा कर्मचारीहरुको तलब सिधै खातामा पठाएपछि शिक्षकहरु खुसी भएका हुन ।
जिल्लामै पहिलोपटक शिक्षकको खातामा सिधै तलब पठाउन शुरु गर्दा शिक्षकहरुमा खुसियाली छाएको छ । त्रैमासिक रुपमा तलब पाउँदै आएका शिक्षकहरुलाई जीतपुरसिमरा उपमहानगरपालिकाले फागुनदेखि नियमित रुपमा मासिक तलब दिने व्यवस्था मिलाएको हो । सोमबार सबै शिक्षकको माघ महिनाको तलब ब्यक्तिगत खातामा निकासा भइसकेको नगरप्रमुख राजन पौडेलको सचिवालयले जनाएको छ ।
यसअघि उपमहानगरपालिकाले विद्यालयको खातामा तलब पठाउने गरेको थियो । विद्यालयको खातामा उपमहानगरपालिकाले पठाएको पैसा फेरि शिक्षकको खातामा पठाउन प्रधानाध्यापकहरुले एक सातासम्म लगाउने गरेका थिए ।
लेखापाल नभएका आधारभूत विद्यालयका प्रधानाध्यापकहरुलाई तलब निकासा अतिरिक्त बोझका रुपमा रहेको थियो । नेरामावि फतेपुरकी मावि शिक्षक लिला दाहालले सामाजिक सञ्जालमा उपमहानगरलाई धन्यवाद दिएकी छिन् । ‘पहिलोपटक शिक्षकहरुको मासिक तलबभत्ता शिक्षकहरुको खातामा दाखिला गरिदिनुभएकोमा उपमहानगरपालिकालाई धन्यबाद, आज छुट्टै खुशीको अनुभुती ।’ दाहालले फेसबुकमा लेखेकी हुन् ।
यसगरी अन्य विद्यालयका शिक्षक शिक्षिकाहरुले पनि खुसी व्यक्त गरेका छन ।
