रञ्जन यादब /पर्सा
पर्साको बन गस्ती टोलीले बिहिबार साँझ बड्निहारबाट काठको गोलिया सहित साईकललाई नियन्त्रणमा लिएको छ । पर्सागढी नगरपालिका वडा नं.३ बड्निहारको चितवनी नजिकको बन क्षेत्रबाट साईकलमा लोड गरिएको ७.७५ क्युफिटको काठको गोलिया बरामद भएको सब डिभिजन बन कार्यालय बड्निहारका बन अधिकृत नवनीत मिश्राले जानकारी दिए ।
नियमित बन गस्तीको क्रममा दुई जनाको सङ्ख्यामा रहेका मानिसहरु साईकलमा काठ लोड गरी ल्याउँदै थिए । उनीहरुले बन गस्ती टोलीलाई देखेर साईकल सहितको काठ छोडेर फरार भएको बन अधिकृत मिश्राले बताए ।
बरामद काठको गोलिया र मानिस सम्बन्धमा आवश्यक अनुसन्धान भईरहेको डिभिजन बन कार्यालय पर्साले जनाएको छ । डिभिजनल बन अधिकृत मञ्जुर अहमदले जिल्लाका बिभिन्न ठाउँमा काठ ,दाउरा चोरी निकासी नियन्त्रण र बनजङ्गल संरक्षण अभियान अन्तर्गत नियमित गस्तीलाई तिब्रता दिएको बताए ।
कहिँकतै जङ्गलमा चोरी निकासी गरिरहेको देख्नुभएमा नजिकको बन पोस्ट ,सब डिभिजन वा डिभिजन बन कार्यालय पर्सामा सम्पर्क गर्न अनुरोध गरे ।
