रञ्जन यादब /बारा
जीतपुरसिमरा उपमहानगरपालिकाका सरकारी प्रतिनिधि तथा जनप्रतिनिधिहरूबीच बौद्धिक अपाङ्गता समावेशी नीतिहरूबारे एकदिने अन्तरक्रिया कार्यक्रम सम्पन्न भएको छ। बौद्धिक अपाङ्गता अभिभावक संघ बारा द्वारा आयोजित कार्यक्रम लेब इन्क्लुजन डेनमार्क को सहयोगमा सिमरामा गरिएको थियो।कार्यक्रमका प्रमुख अतिथि उपमहानगरपालिकाका नगरप्रमुख राजन पौडेलले अपाङ्गता भएका व्यक्तिहरूको हक–अधिकार र पहुँच सुनिश्चित गर्न उपमहानगरपालिका पूर्ण रूपमा गम्भीर रहेको उल्लेख गर्नुभयो। उहाँले बौद्धिक अपाङ्गता मात्र नभई सबै प्रकारका अपाङ्गता भएका व्यक्तिहरूलाई लक्षित गरेर समावेशी योजना कार्यान्वयन गर्न कार्यपालिकामा विशेष छलफल अघि बढाइएको जानकारी दिनुभयो।
नगरप्रमुख पौडेलले उपमहानगरपालिकाबाट प्राप्त हुने सेवा, सुविधा, अपाङ्गता परिचयपत्र, सामाजिक सुरक्षा भत्ता, अपाङ्गमैत्री पूर्वाधार तथा शिक्षादेखि स्वास्थ्यसम्मका कार्यक्रमलाई अझ प्रभावकारी बनाउन स्थानीय तह कटिबद्ध रहेको पनि उल्लेख गर्नुभयो।कार्यक्रममा सहजकर्ताका रूपमा रहेकी लक्ष्मी खरेलले अपाङ्गता भएका व्यक्तिले स्थानीय तहबाट पाउन सक्ने सेवा–सुविधा, कानुनी व्यवस्था, अभिभावकको भूमिकालगायतका विषयमा विस्तृत प्रस्तुतीकरण गर्नुभएको थियो।
अन्तरक्रिया कार्यक्रममा प्रमुख प्रशासकीय अधिकृत शान्तिराज प्रसाईँ, विभिन्न वडा अध्यक्षहरू, बौद्धिक अपाङ्गता भएका व्यक्तिहरू तथा उनीहरूको अभिभावकको उल्लेखनीय सहभागिता रहेको थियो। सहभागीहरूले स्थानीय तहमा अपाङ्गमैत्री कार्यक्रम विस्तार, पहुँचयुक्त पूर्वाधार निर्माण, सिकाइ–अभ्यास केन्द्र स्थापना तथा अभिभावक क्षमता अभिवृद्धिका कार्यक्रमलाई प्राथमिकतामा राख्न सुझाव दिएका थिए।
कार्यक्रमले बौद्धिक अपाङ्गता भएका नागरिकका मुद्दा, चुनौती र आवश्यकताबारे स्थानीय सरकार र सरोकारवालाबीच सहकार्य र समन्वयलाई थप मजबुत बनाउने बिषयमा छलफल गरिएको आयोजकका नारायण घिमिरेले बताए ।
